Bu qovşaq əvvəllər şəbəkədə mövcud olan üç telefon qovşağından biri – Lenin telefon qovşağının bazasında yaradılmışdır. 80-cı illərdən başlayaraq müstəqil qovşaq kimi fəaliyyət göstərir. Qovşaq Mərdəkan qəsəbəsində yerləşir. Əsasən Mərdəkan, Buzovna, Binə, Türkan, Zirə, Qala, Pirallahı, Albalılıq bağ massivi, Gürgan,Türkan üzümçülük qəsəbələrinin əhalisinə rabitə xidməti göstərir. Qovşaq müasir standartlara uyğun kompyuterləşdirilmiş abunəçi şöbəsinə malikdir. EATS 453/553, EATS 454/554, EATS 459/559, EATS 456/556 və EATS 457 qovşağın stansiyalarıdır. Qovşaqda 172 nəfər mühəndis-texniki işçi və qulluqçu işləyir.

EATS 453/553 * Buzovna qəsəbəsində yerləşir. Respublikada ilk koordinat tipli ATS kimi fəaliyyət göstərmişdir. 2000-ci ildə bu stansiya rekonstruksiya olunaraq yeni S-12 tipli EATS-lə əvəz olunmuşdur. 7512 nömrə abunə tutumuna malikdir. Stansiyanın Bilgəh sanatoriya zonasında 1504 nömrəlik, Albalılıq bağ massivində 2046 nömrəlik köməkçi stansiyaları mövcuddur. ATS-in stansiya və xətt qurğularında 30 nəfərə yaxın mütəxəssis çalışır.

EATS 454/554 * Mərdəkan qəsəbəsində Qovşağın inzibati binasında yerləşir. Əvvəllər köhnə dekad-addım tipli ATS 454 kimi fəaliyyət göstərmişdir. 1999-cu ildə Türkiyə mütəxəssislərinin tərəfindən rekonstruksiya olunaraq genişləndirilmişdir. 10 min nömrə tutumuna malik S-12 tipli elektron stansiyası Mərdəkan qəsəbəsi və ətraf kəndlərin sakinlərinə, müəssisə və təşkilatlara keyfiyyətli rabitə xidməti göstərir. Şağan kəndində 2048 nömrəlik, Dövlət rayon elektrik stansiyası yaşayış sahəsində 1456 nömrəlik, Türkan qəsəbəsində 2048 nömrəlik, Türkan üzümçülük qəsəbəsində 256 nömrəlik, Gürgan qəsəbəsində 256 nömrəlik, Qala kəndində 1104 nömrəlik, Qala stansiya 608 nömrəlik, Qala hərbi şəhərcik 768 nömrəlik, Sahil stansiya bağ massivində 896 nömrəlik ONU-1 tipli köməkçi stansiya istifadəyə verilmişdir. EATS-in stansiya və xətt qurğularının istismarında 50 nəfərə yaxın mühəndis- texniki işçi və qulluqçu çalışır.

EATS 456/556 * Binə qəsəbəsində yerləşir. Əvvəllər koordinat tipli ATS kimi fəaliyyət göstərən Binə ATS-i 2004-cü ilin sonunda HUAWEİ şirkətinin mütəxəssisləri tərəfindən daha müasir texnologiyaya uyğun 6308 nömrə tutuma malik C&C08 tipli EATS-lə əvəz edilmişdir. İqtisadi cəhətdən sərfəli və müasir texnologiyalara cavab verən ONU-2 tipli 896 nömrə tutuma malik xidmət olunmayan yarımstansiya əhalinin istifadəsinə verilmişdir.

Hövsan südçülük sovxozu ərazisində 1664 nömrə tutuma malik RSP tipli yarımstansiya mövcuddur.

EATS-456 (Zirə) * Zirə qəsəbəsində yerləşir. Əvvəllər 1500 nömrə tutuma malik koordinat tipli ATS idi. 2004-cü ildə rekonstruksiya olunaraq 2384 nömrə tutuma malik RSM tipli EATS ilə əvəz edilmişdir. 10 nəfər mühəndis texniki işçi çalışır. EATS - Zirə qəsəbəsi və ətraf bağ massivində yaşayan əhaliyə yüksək keyfiyyətli rabitə xidməti göstərir.

EATS 457 * Pirallahı qəsəbəsində əhalisinin əksəriyyəti neftçilər təşkil edən qəsəbə sakinlərinə xidmət göstərir. Köhnə dekada addım tipli ATS 2004-cü ildə rekonstruksiya olunaraq 3520 nömrə tutuma malik RSM tipli EATS-lə əvəz edilmişdir. EATS-in stansiya və xətt qurğularında 10 nəfər mühəndis texniki işçi çalışır.